Sálmur

Sýndu oss Drottinn sannleikans mynd

svaraðu kalli, leystu frá synd.

Alvaldur Faðir eilífa ljós

umvafinn elsku, fegursta rós.

 

Færðu oss Drottinn friðarins lind

frelsaðu mannsins sál þegar blind,

veður í villu hallar þér frá,

 voldugi Faðir himninum á.

 

Gefðu oss Drottinn gleðinnar fró

glæddu oss lífi, huganum ró.

Mátt þinn og kærleik mikla um lönd

mildur ó Kristur, rétt þína hönd.

 

Fögnum, því Drottins dásemdir fást,

dagurinn rís, ei þurfum að þjást.

Þökkum af hjarta, þökkum í trú,

þökkum því dagur lífsins er nú!

 

                                                                                Þóra I. Sig.   2007.

 

Athugasemdir

[Guðrún Sæmundsdóttir, 18.9.2007 kl. 00:33]

Ofboðslega er þetta fallegur sálmur hjá þér, Guð blessi þig og allt sem þér er kært í Jesú nafni

[Þóra I. Sigurjónsdóttir, 18.9.2007 kl. 12:44]

Sæl og kærar þakkir fyrir það,

eg skil bara ekki af hverju hann kemur ekki réttur inn, þeas uppsetningin á honum, hálf fáránlegt svona

Guðs blessun til þín einnig

[Þóra I. Sigurjónsdóttir, 18.9.2007 kl. 12:53]

Svei mér þá það kom núna, gat lagað þetta eitthvað